ഈ നടന്ന വഴികള്‍
പതിഞ്ഞ കാല്‍ പെരുമാറ്റങ്ങള്‍
ഒരിക്കലും പുല്ലുമുള ക്കില്ലെന്ന്‍ പറഞ്ഞ നടപ്പാത
പോക്കുവരവുകള്‍ പതുക്കെ നിറുത്തി
വല്ലപ്പോഴും ഒരു പെരുന്നാളിനോ ഓണത്തിനോ
കല്യാണത്തിനോ ശവസംസ്കാരത്തിനോ
പോയാലായി;
പിന്നെ പതുക്കെ വഴി മറന്നു; അയാള്‍ വഴിയെയും
വഴി നിറയെ പുല്ലുകള്‍ തല നാമ്പ് നീട്ടി;
പശുക്കള്‍ കുശലം പറച്ചില്‍ ആ വഴിക്കാക്കി
ചാണകകൂമ്പാരങ്ങള്‍ വഴിമുടക്കികളായി
ഞാണപുല്ലുകള്‍ ആകാശം നോക്കി വളര്‍ന്നു.
ആരും പറയില്ല ഈ പറമ്പിലും
ഒരു പഴയ വഴിയുണ്ടായിരുന്നെന്നു.
എല്ലാ പരിചിത വഴികളും
അങ്ങിനെയാണ് ഇല്ലാതാകുന്നത്;
സൌഹൃദങ്ങളും.
No comments:
Post a Comment